बोम्जन गुरुङ
दक्षिण कोरिया । दक्षिण कोरिया स्थित गण्डकी प्रदेश समाजको आयोजनामा आउँदो मे १२ मा मैत्रीपूर्ण गण्डकी कप भलिबल प्रतियोगिता २०२४ गर्ने भएको छ ।
समाजले स्वास्थ्यका लागि खेल, सद्भाव र समन्वयको मेल भन्ने नारा सहित भलिबल खेलको साझा संस्था नेपाल कोरिया भलिबल संघको मातहतमा रहने गरी मैत्रीपूर्ण भलिबल प्रतियोगिता गर्न लागिएको हो । प्रतियोगिता सुवनको आजु युनिभर्सिटीको खेलमैदानमा आयोजना गरिने समाजका अध्यक्ष प्रविण गिरीले बताए । प्रतियोगितामा विजेता टिम र उपविजेता टिमलाई आकर्षक ट्रफी, मेडल र प्रमाण पत्र सहित क्रमशः २० लाख र १२ लाख कोरियन वोन पुरस्कार प्रदान गरिने जनाएको छ ।
त्यसैगरी प्रतियोगितामा सान्तवना हुने दुई टिमलाई ४÷४ लाख कोरियन वोन सहित मेडल र प्रमाण पत्र प्रदान गरिनुका साथै अन्य विधातर्फ प्रमाण पत्र सहित खेल अवधिभरको उत्कृष्ट खेलाडीले १ लाख, उत्कृष्ट स्पाईकर, उत्कृष्ट लिफ्टर र उत्कृष्ट ब्लकरलाई जनही ५० हजार कोरियन वोन प्रदान गरिने खेल संयोजक श्रवण श्रेष्ठले जानकारी दिए । स्थापनाकाल देखि परोपकारी कार्यमा आफ्नो दरिलो उपस्थिति देखाउँदै अन्य संघसंस्थाहरुसँग निरन्तर सहकार्य र हातेमालो गरिरहेको सन्दर्भ उल्लेख गर्दै प्रतियोगिता सफल बनाउन प्रायोजन, सहप्रायोजन र सौजन्यको निमित्त विभिन्न व्यक्ति, संघसंस्था, प्रतिष्ठान, मनकारी व्यक्ति र शुभचिन्तकहरुबाट सहयोगको अपेक्षा समेत गरिएको समाजका महासचिव विदुर शर्माले स्पष्ट पारे ।
गण्डकी प्रदेश अन्तर्गतका ११ जिल्लाहरु मात्र नभई अन्य कोरियास्थित अन्य संघसंस्थाहरुसँग उत्तिकै सहयोग र भरपूर समन्वय गर्दै आइरहेको गण्डकी प्रदेश समाजद्धारा आयोजित उक्त गण्डकी कप भलिबल प्रतियोगिता २०२४ मा टिम दर्ता शुल्क ३ लाख ५० हजार कोरियन वोन तोकिएको र टिम दर्ता अन्तिम मिति ०५ मे अप्रिल २०२४ सम्म कायम गरिएको छ ।
