हेटौंडा । नेकपा एमाले मकवानपुरको अध्यक्षमा श्रीधर पोखरेल निर्वाचित भएका छन् । पोखरेलले अर्का प्रत्यासी इन्द्रमान स्याङ्तानलाई ५१ मतको अन्तरले पराजित गर्दै अध्यक्षमा निर्वाचित भएका हुन् ।
पोखरेलले ३१३ मत प्राप्त गर्दा स्याङ्तानले २६२ मत प्राप्त गरेका हुन् । यस्तै, अध्यक्षकै प्रतिस्पर्धी लालबहादुर थापाले १६६ मत र देवराज रिमालले ११ मत प्राप्त गरेका छन् । त्यसैगरी उपाध्यक्षमा भिमफेदी गाउँपालिकाका अध्यक्ष समेत रहेका हिदम लामा निर्वाचित भएका छन् । उपाध्यक्षका अर्का प्रत्यासी सुनिल मोक्तानलाई पराजित गर्दै लामा निर्वाचित भएका हुन् । लामाले ४७६ मत पाउँदा मोक्तानले १९७ मत प्राप्त गरे । उपाध्यक्षकै प्रतिस्पर्धी भरत दुलालले ३८ र धुर्व चौलागाईंले २६ मत पाएका छन् ।
यसैगरी, सचिवमा पदमा सीता विष्ट विजयी भएकी छन् । अर्का प्रतिस्पर्धी मदन दाहाललाई पराजित गर्दै विष्ट सचिवमा विजयी भएकी हुन् । यस्तै, सचिवकै अर्का प्रत्यासी राजन थापाले १७१ मत पाएका छन् । खल्ला तर्फको उपसचिवमा फुर्वा लामा २४१ मतसहित निर्वाचित भएका छन् । यसैगरी, उपसचिव महिलातर्फ भने आरती पाठक २४१ मतसहित विजयी भएकी छन् । मत गणना हेटौंडा–४ पशुपति मन्दिर हलमा गरिएको थियो । अध्यक्षमा निर्वाचित पोखरेल एमालेबाट फुटेर माधव नेपालको नेतृत्वमा गठन भएको नेकपा एकिकृत समाजवादीको मकवानपुर जिल्ला अध्यक्ष समेत बनेको थियो । स्थानीय निर्वाचनको समयमा पार्टीमा असन्तुष्टि जनाउदै पुनः एमालेमा फर्केका थिए ।
